Travelliker 的部落格

來到日本，其實大阪心斎橋一帶都有好幾間有名嘅壽司店，例如以平出名嘅大起水產同元祖回轉壽司店元祿，但因為出名一到食飯時候就超多人排隊。所以今次推薦的是半隱藏版壽司店 --- 魚心壽司!

魚心壽司賣點係大大份的握壽司，唔係飯多而係魚生份量超多!叫佢半隱藏版，係因為有唔少台灣Blogger都做過介紹，但相對其他名壽司店，佢係遊客心中唔算好有名氣，換句話說咪就係唔洗排咁耐隊囉!今次去大阪小編食左兩次(因為太好食…)，食飯時候去都只係等左唔洗10分鐘就有得食啦!

魚心壽司店面唔算大，入去左手邊係吧台，師傅會係入面即製手握壽司，右邊就係卡位。入面附有中英文餐牌連圖，唔驚唔識叫。

睇餐牌都感到份量十足，而且價錢唔貴!見到實物更加覺得份量驚人，而且非常新鮮，唔會因為量多而影響質素!!

多到漏出黎嘅三文魚子

有兩層嘅厚切吞拿魚

肥美嘅大大條鰻魚

全部都大大件!

重點黎啦!成板上嘅海膽壽司! 極鮮甜仲要平黑門多多聲，只要1400日圓

魚心壽司係可以單叫一件，將餐牌價錢除2就可以，即係一件鰻魚壽司只需要500日圓，想試多幾款可以單叫，但記緊要同服務員講清楚，唔係佢會直接幫你落一客兩件。

因為食完依然念念不忘魚心壽司，到臨走個日又去食多次!午餐比晚餐多左壽司定食可選，依然係極抵食

最平700日圓有交易，但壽司份量冇咁大，不過勝在抵食，仲可以試多幾款壽司。

魚心壽司心齋橋店就係千日前商店街內法善寺橫丁對面的小巷，一轉入去就見到招牌，轉出大路就見到一蘭同有名嘅大阪燒店美津の大阪燒，算十分易搵。

番黎搵資料先發現魚心壽司有幾間分店，京都同神戶都有，但見最多人推薦就係心斎橋店，附上官網大家可以上去睇睇: http://www.ajibil.com/uoshin/

魚心壽司

地址: 大阪市中央区千日前1-7-9

營業時間: 12:00 ~ 24:00

(部分圖片取自網絡/官網)